Assam sorkarin Sonitpur-ah 50mw solar power plant din dawn

Assam sorkar chuan Sonpitpur district-a Barchalla hmuna nikuma sorkar rama chengte an chhuahtirnaah chuan 50mw solar plant din a tum.

Chief minister Himanta Biswa Sarma hoa Ningania cabinet meeting-ah he thutlukna hi an siam a ni.

Meeting zawha chanchinthar lakhawmtute a kawmnaah, tourism minister Jayanta Malla Baruah chuan," Barchalla-ah hian 50 mw solar plant kan din dawn a, hei hian dan loa sorkar ram luah ṭhin pawh a ven phah ngei ang," a ti.

Nikum September 3 khan Assam sorkar chuan Barchalla-a sorkar ram, bigha 1,000-a zaua cheng, chhungkaw 299 chu a lo chhuahtir tawh a ni. Heng chhungkua zinga a tam zawk zawk chu Bengali an ni a, he hmunah hian kum eng emaw zat an lo khawsa tawh a ni.

Cabinet meeting hian Sagarmala project hnuaia hmun pawimawh panga - Kamakhya, Doul Gobinda, Ashwaklanta, Umananda leh Pandu Nath kalpawhna tur closed river circuit siam a remti bawk. Hei hi state sorkar leh sorkar laipuiin an thawkdun dawn a, state hian share 45% neiin, sorkar laipuiin 55% a nei thung ang.

Baruah chuan in nuai 44-ah smart electricty meter dah tum a ni bawk tih sawiin, hemi atan hian sorkar chuan Rs vbc 4,362 vel a seng dawn a ni, a ti. Mahse hemi hmang hian technician 5,000 leh research agent 2,000 vel tan hna thawh tur siamsak theih beisei a nih thu a sawi.

Cabinet chuan Industrial Training Institutes (ITI) certificate chu High School Leaving Certificate (HSLC) leh Higher Secondary nen intluka pawm a remti bawk.