'Rally of Nagaland' final round vai liam

Indian National Rally Championship (INRC) round lina leh final round, 'Rally of Nagaland' chu Ningani khan Kohima-a Indira Gandhi (IG) Stadium-a hockey ground aṭangin department of Youth Resources & Sports advisor, Zale Neikha-a'n a vai liam.

Federation of Motor Sports Council of India (FMSCI) buatsaih he rally hi Nagaland Adventure Club (NAC) leh state sorkarin an lo buaipui a ni.

Zale Neikha chuan he sporting event hi motorsports lover-te tana thil chhinchhiah tlak tak a nih thu sawiin, he sport hian foreign tourist-te pawh hip lutin, tourism lam pawhin hlawkna an tel phah dawn a ni, a ti. He event puala Talent Hunt buatsaih pawh chuan state chhunga motorsports lama tui talent nei ṭha tak takte tan pawh inphochhuahna hun ṭha a siamsak dawn a ni, a ti.

Zale chuan state chhunga motorsports chawilarna tur Nagaland Adventure Club (NAC) hmalakna chu fakin, Federation of Motor Sports Club of India (FMSCI) puihna nen ram pum huapah pawh an invawrh chhuah theih a beisei thu a sawi bawk.

INRC round khatna hi Chennai-ah neih niin, round hnihna Coimbatore-ah leh a round thumna hi Bengaluru-ah neih a lo ni tawh a ni. Podium ceremony hi vawiinah RCEMPA, Jotsoma-ah neih a ni ang.