EC-in Meghalaya inthlan neih tur atana inbuatsaihna enpui

Chief election commissioner (CEC) Rajiv Kumar kaihhruai ECI team chuan Meghalaya-in assembly inthlan neih tur atana a inbuatsaih dante chu Zirtawpni liamta khan a enpui. Inthlan felfai leh hlawhtling tak buatsaih a nih theih nan chief secretary, DGP leh sorkar official-te nen inkawmna hun an hmang a ni.

CEC chuan Meghalaya assembly inthlan neih tura chuh tur, candidate-te chuan print leh electronic media ah criminal record an lo neih tawhte chu vawi thum tal an tarlang tur a ni tiin, political party te pawhin criminal background nei candidate atana an ruatna chhan chu mipuite an hrilhfiah a ngai bawk a ni, a ti. Hei hi mipuiten an aiawh tur an thlan hmain candidate te chungchang an hriatchian theihna tura tih a nih thu a sawi.

Rajiv Kumar kaihhruai hian election commissoner Arun Goel leh Anup Chandra Pandy te chuan inthlan neih tur atana inbuatsaihna hi ni hnih chhung an enpui a, Zirtawpni liam ta khan an zo a ni

Kumar chuan inthlanna felfai, langtlang kalpuina turin ECI chuan a ṭul angin kawng hrang hrangin hma a la tih a sawi Hemi kawngah hian sorkar agency zawng zawng pawh tihsual awm lo tura theihtawp chhuah tura tih a nih thu a sawi bawk. Venhim hna thawktu tur, state leh central armed force pawh ṭhahnem tak dah an ni, a ti.

CEC chuan tun hnaia Assam-Meghalaya border-a buaina thlenna biala cheng, registered voter-te pawhin inthlanah hian vote an thlak theih dawn thu a sawi. "Harsatna a awm dawn lo. Thil awmdan pawh kan ngaihtuah ho a, state pahniha district official-te nen pawh meeting kan nei a ni," a ti. Nikum November thlaa state pahnih ramri bula buaina chhuakah khan Meghalaya mi panga leh Assam forest guard pakhat an thi a ni.

Meghalaya assembly ah hian seat 60 awmin, seat 55 chu ST tan a ni a, a bak seat 5 chu open seat a ni thung. Vote thlakna tur, polling station hi 3,482 awmin, chawhrualin polling station pakhatah voter 620 zel awm ang an ni. Polling booth 120 chu hmeichhe hlang team in an enkawl dawn , booth 60 chu thalai rual, young polling team ten an enkawl ang. Polling station 50% ah webcasting facility a awm dawn bawk a ni

EC chuan Meghalaya-a kum 100 tling mi 290 te hnenah lawmpuina thu thawnin, inthlan lo awm turah pawh hian vote thlak ṭheuh turin a sawm.