Assam Rifles kutah KLO helpawl hotu inpe

Helpawl, Kamtapur Liberation Organisation (KLO) hotu Jeevan Singha, Jeevan Koch Timir Das tih bawk chu Indo-Myanmar border, Nagaland-a Longwa bialah kar liam ta Zirtawpni khan Assam Rifles kutah a inpe. Sorkar laipui leh state sorkar nena inremna ṭha tak hnuaia awm a duh tawh tih a sawi.

Assam chief minister Himanta Biswa Sarma-a'n inbiakna nei tura sawmna a siam hnuah, thla hnih liam ta khan KLO hotu pahnih, Kailash Koch leh nupui Jugli-te chu Kolkata-ah West Bengal police-te kutah an lo inpe tawh bawk.

Kum 1995-a din, KLO member-te ho Koch Rajbangshi hnam an ni a, Cooch Behar, Malda, North Dinajpur, South Dinajpur leh Jalpaiguri district huamah state hran siam an phut a ni.

Singha leh a ho ṭhenkhatte hi Myanmar-a a bihrukna aṭanga chhuakin, Nagaland-a Assam rifles sipaite kutah an inpe a, hemi hnua sorkar laipui nena inbe turin Delhi lam an pan niin an tarlang. Singha hi Assam leh West Bengal-a KLO chetlakna hrang hrangah a tel a, an pawl zawmtute chu ralthuam hman dante a zirtir thin nia sawi a ni bawk. ULFA helpawl nen pawh inzawmna ṭha tak an nei niin an sawi.