CBI-in thamna latu Guwahati-a railway officer man

Central Bureau of Investigation (CBI) chuan Guwahati-a additional divisional railway manager (ADRM) chu thamna a lak vangin an man. Rs nuai 50 thamna inpek chungchangah hian mi dang paruk man an ni bawk a, an zingah hian private contractor pawh a tel.

Guwahati-a ADRM Jitendra Pal Singh hi 1997-batch Indian Railways Service officer a ni a, private contractor an man hi Shyama, Kumar Deb niin thamna inpek dan tur ruahmantua puh a ni.

CBI chuan Singh hian private contractor hi Northeast Frontier Railway (NFR) hnuaia hna thawh turah dan dik tawk loa contract pein, measurement book siam danah te, running bill kalpui danah te, pending bill pekchhuah bakah, security deposit pek danah te thil fel tawk lo a awm tih an sawi. Hei bakah hian ADRM hian chief engineer (construction), New Jalpaiguri, NFR-a nih lai pawhin contractor-te hnen aṭangin thamna hi a phut fo niin an sawi.

Investigation agency hian railway officer man tum hian thang an kam a, hawala channel kaltlanga thamna Rs nuai 50 a dawn hi an man fuh ta a ni. A chenna in leh hmun dangte dap nghalin, pawisa fai Rs nuai 47 bakah laptop leh document dik tawk lo eng emaw zat an

man tel.