Sikkim hmasawnna tura HSP thlang turin Bhutia-a'n mipuite sawm

Indian football legend, Hamro Sikkim Party (HSP) president ni bawk Bhaichung Bhutia chuan an state-a sorkar tawh hrang hrang hnuaiah hmasawnna hmuh tur a awm lo tih sawiin, kum 2024 assembly inthlan neih hunah danglamna thlen ngei a nih theihna atana HSP chu vote ṭheuh turin mipuite a sawm.

'Maghe Sankranti' puala state mipuite hnena open letter a thawnah, Bhutia chuan sector pawimawh - road connectivity, education, healthcare, internet service leh transportation-ahte an state chuan a dawn tur ang hmasawnna a hmu lo a ni tiin, "Politics leh politician-te ṭhat loh avangin, kan state chuan sector hrang hrangah hmasawnna a hmu ve lo a ni," a ti. Rorellai sorkar leh sorkar hmasate pawh infrastructure lam ngaihthahahah a puh.

Assembly inthlan neih leh hunah HSP chu thlan tlin a nih chuan, assembly-a Nepali ṭawng hmangte tana reservation chungchanga buainate chingfelin, state mipuite tan intluktlanna leh rorelna dik a thlen dawn tih a sawi. Sikkim state chu ram dang pathum nena inri a nih avangin an state tan Inner Line Permit (ILP) hman chu thil ṭul nia a ngaih thu a sawi bawk.

HSP hian nakkuma inthlan neih tura regional party dang, Sikkim Republic Party an thawhpui tur thu an lo puang tawh a, party pahnihte hian three-point Common Minimum Programme (CMP) pawh an lo tlangzarh tawh a ni.