Manipur : Moreh-a duty police-te kut aṭangin ruihhlo tam tham tak man

Manipur-a border town, Moreh-a duty Manipur police team kut aṭangin Kakching district-a police team dang chuan ruihhlo tam tham tak an man.

Official thuchhuah an siamah, Kakching district police team hian Thawhṭanni khan Moreh-a duty, CDO team unit motor maruti gypsy aṭangin ruihhlote hi National Highway 102 (Imphal-Moreh) ah an man a ni. An ruihhlo man hi heroin powder kg 1.336 leh WY tablet kg 9.151 an ni. Heroin hi sahbawn bawm 100-ah thukruk a ni. An kut aṭang hian pawisa fai, Rs 80,000 an man tel bawk. Ruihhlo mante hi local market-ah Rs vbc 3 man hu a ni.

Ruihhlo kengtu an mante hi Havildar Kh. Achouba Singh, Rifleman Th Subhash Chothe, Y Dineshwar Meitei, Rifleman M Premchandra Singh leh Rifleman N Dorendrajit Singh-te niin, Moreh-a Karaopokpi-a CDO unit-a post-te an ni. Kakching police station-ah an ruihhlo kente nen hian hlan an ni.

Chief minister N Biren Singh chuan ruihhlo tawlhruknaa inhnamhnawihte chu eng mi pawh ni se ngaihnathiamna a awm dawn lo tiin, police kut aṭanga ruihhlo man a nih chungchanga zawhna a chhannaah a sawi. CM hi Delhi-ah BJP national executive meeting neiin a awm mek a ni. Moreh-a duty police team kut aṭanga ruihhlo man chungchang chu chhui chian a ni dawn a, mawhphurtute chu dan ang takin na taka an chungthu ngaihtuah a ni ang, a ti.