Sikkim sorkarin fa nei tamte hamṭhatna tur siamsak

Sikkim chief minister Prem Singh Tamang chuan state leilung fate chu fa tam zawk nei tura fuihin, fa nei tamte tan hamṭhatna siamsak a ni dawn tih a sawi.

South Sikkim-a Jorethang khuaa Maghe Sankranti function a hmanpuinaah, Chief Minister chuan an state-ah mihring punna a hniam hle tih sawiin, tun hnai kum eng emaw chen aṭang khan nu pakhatin fa pakhat nei zel ang chauh an nih thu a sawi. "Kan punna hniam lutuk hi kan siamṭhat a, fa tam zawk kan neih a ngai a ni," a ti.

CM Tamang chuan a kaihhruai sorkar chuan sorkar hnathawk hmeichhia, nau nei turte chu maternity leave ni 365 bakah, mipa te pawh paternity leave ni 30 chhung pek a lo phalsak tawh tih a sawi. Hei bakah hian hmeichhiate chu fa pahnih an neih chuan increment vawi khat pek leh, fa pathum an neih chuan increment ṭum hnih pek a tum bawk. Mahse fa pakhat chauh neite erawh he hamṭhatna hi an dil ve thei dawn lo a ni.

Tamang chuan sorkar hnathawk ni kher lo, fa nei tamte pawh hamṭhatna siamsak an ni dawn tih sawiin, hei hi Health leh Women and Child Care department lamin an buaipui mek tih a sawi.

State sorkar hian nu, nau pai lama harsatna neite tan hospital ṭhenkhatah IVF facility-te pawh a lo dah tawh a, hemi hmanga naupai thei tura enkawlte chu sum lama puihna, Rs nuai 3 zel pek an ni. IVF facility kaltlang hian nu 38 chuan nau an pai tawh tih CM chuan a sawi bawk.

Sorkar hmasa, CM hlui Pwan Kumar Changling kaihhruai sorkarin Sikkim mipuite fa nei tlem a, fa pakhat chauh nei tura a fuih ṭhin chu sawiselin, CM Tamang chuan a kaihhruai Sikkim Krantikari Morcha (SKM) sorkar erawh chuan state mipuite chu chhungkaw lian tak din a, fa pathum tal nei tura a duh thu a sawi. Sikkim state mipuite hi nuai sarih an tling lo deuh a ni.