Meghalaya-a govt engineering college hmasa ber hawng

Meghalaya chief minister Conrad K Sangma chuan an state-a government engineering college hmasa ber chu Thawhṭanni khan a hawng.

Chief minister Sangma chuan National People's Party (NPP) kaihhruai sorkar hnuaiah an state-ah hmasawnna nasa tak thlengin, thil tam takah a hmasa ber tur din a awm fo tih a sawi. Sorkar chuan ṭhalaite hmakhua a ngai pawimawh a, kum nga chhung theihtawp a chhuah tih sawiin, "Field hrang hrangah ṭhalaite tan hlawhtlinna leh hmasawnna an neihna turin remchang siamsak an ni," a ti.

Engineering college hi Rashtriya Uchchatar Shiksha Abhiyan (RUSA) hnuaiah sak niin, Rs vbc 26 sen a ni. He college hi East Khasi Hills district-a Mawlai-Kynton Massar-a Shillong Polytechnic campus chhungah, ram acrea 7.8-a zauah siam a ni.

Shillong government engineering college-ah hian branch pathum - civil engineering, electricial engineering leh mining engineering-ah degree course kalpui a ni dawn a, branch tinah hian state 30 ṭheuh a awm ang.

Chief Minister hian tun hnaiah Meghalaya state university hmasa ber tur, Captain Williamson Sangma State University chu Tura bul Balagre-ah a lo hawng tawh bawk.