ECI-in Meghalaya, Nagaland leh Tripura inthlan hun tur a puang

Election Commission of India chuan nimin tlai khan hmarchhak state pathum - Meghalaya, Nagaland leh Tripura assemby inthlan neih hun tur a puang.

Chief election commissioner (CEC) Rajiv Kumar chuan inthlan neih hun tur hi puangin, heng state pathumah hian model code of conduct (MCC) hman a ni nghal tih a sawi. Nagaland assembly term kal mek hi March 12-ah a tawp dawn a, Meghalaya assembly 15 leh, Tripura assembly term hi March 22 an tawp dawn a ni.

Meghalaya
Seat 60 awmna, Meghalaya assembly inthlan hi thawh khata neiin February 27-ah neih a ni dawn a, March 2-ah vote tlate chhiarin inthlan result hi puan a ni ang.

Inthlan neih tur atan hian January 31-ah gazette notification tihchhuah a ni dawn a, inthlana chuh tumte tan February 7 thleng nomination paper a thehluh theih ang. Nomination paper-te hi February 8 hian endik an ni dawn a, inhnukdawk duhte tan February 10 thleng hun hawn a ni.

Kum 2018 state assembly inthlanah khan Indian National Congress chu party mala seat la hnem ber niin seat 21 an la. Mahse party mala sorkar an siam theih loh avangin, National People's Party (NPP) kaihhruaiin Meghalaya Democratic Alliance (MDA) sorkar a ding a, ṭangrual sorkarah hian BJP pawh an tel. Conrad K Sangma chu chief minister a ni.

Nagaland
Nagaland assembly seat 60-ah inthlan hi thawh khata neih a ni dawn bawk a, February 27-ah vote thlakin March 2-ah vote chhiar a ni ang.

January 31-ah gazette notification a chhuak ang a, nomination paper hi February 7 thleng thehluh theih a ni. February 8-ah nomination paper endikin, February 10 thleng candidate-te tan inhnuhdawh theih a ni.

Nagaland-ah hian Nationalist Democratic Progressive Party (NDPP) leh BJP thawkdun chuan seat 30 an nei a, party dangte thlawpna nen ṭangrual sorkar an din a ni. NDPP hian party malin seat 26 a nei. Mahse Naga issue chinfelna tura chak zawka hma lak a nih theihna atan, eptu party-te pawhin ṭangrual sorkar hi thlawpin, eptu pawl awm lohna sorkar a ding zui a ni.

Tribal pawl pasarihte chuan Naga state khawchhak lam bial, district 16 huamah state hran 'Frontier Nagaland' din an phut mek a, an thil phut hi sorkarin a ngaihtuah sak loh chuan an bial huam chhungah hian central leh state inthlan buatsaihte boycott vekah an lo vau tawh a ni. Hei vang hian Nagaland inthlan lo awm turah 'Frontier Nagaland' din phutna hian boruak a nei hle ang.

Tripura
Tripura-a assembly seat 60-ah February 16 hian inthlan neih a ni dawn a, March 2-ah vote tla chhiarin inthlan result puan a ni ang.

Inthlan chungchanga gazette notification chu January 21-ah tihchhuah a ni dawn a, January 30 thleng nomination paper thehluh theih a ni ang. January 31-ah nomination paper-te endik a ni ang a, candidate inhnukdawk duh tan February 2 thleng hun an hawng dawn a ni.

Kum 2018 assembly inthlanah hian BJP chuan kum 20 dawn rorelna lo chelh tawh, Manik Sarkar kaihhruai Communist Party of India (Marxist) chu hnehin, seat 35 lain party mala sorkarna siam thei khawpin an chak a ni. Chief minister atan Biplab Kumar Deb ruat a ni a, mahse nikum khan CM hi thlakin Manik Saha chuan Deb hi a thlak. Tun ṭum inthlanah hian BJP, Congress, Left leh Trinamool Congress-te chu an inbeih tawk chho hle rin a ni.

State pathumah hian vote nei mipa aiin hmeichhia an tam vek a, vote nei thar mi nuai 2.28 an awm bawk. Vote thlakna tur, polling station tinte hi taksa lama rualbanlote pawhin vote an thlak theihna turin ground floor-ah vek siam a ni dawn a, heng mite pui tur hian staff pawh an awm zel dawn tih CEC chuan a sawi. Polling station zinga 73% chu webcast a ni dawn a, hmeichhe staff hlangin an enkawl tur polling station 375 a awm bawk ang. Kum 100 chung lamte chuan polling station pan kher ngai loin in lam aṭangin vote an thlak thei dawn a, hemi atan hian 12D form siam a ni dawn a ni.