Arunachal : Tourism chawilarna turin ni thum awh 'Travel Congress' buatsaih dawn

Arunachal Pradesh Tour Operators’ Association (APTOA) chuan an state-a tourism sector chawilarna turin vawiin aṭangin ni thum awh tur 'Travel Congress' a buatsaih dawn.

Congress hi West Siang district-a Kabu leh Kamba khuaah neih a ni dawn a, APTOA president John Payne chuan rural tourism lam an thlurbing dawn tih a sawi.

Panye chuan rural area-a ṭhalai thuam chakna turin an pawl chuan Congress chhung hian plenary session, panel discussion, exchange of idea and exprience programme-te a huaihawt tel dawn a, hei bakah hian tualchhunga local operator-te pualin hun hman a ni dawn tih a

sawi bawk. "Tualchhung mipui, culture leh an tihdan phungte tichhe si loa local tourism tihhmasawn kan tum a ni. Siang region hian tourism sector lamah theihna sang tak a nei a, hei vang hian he district hi kan thlurbing deuh bik a ni," a ti.

Covid-19 hri leng chu state tourism sector chuan a tuar hle tih Payne chuan a sawi a, mahse hri leng a kiang ṭan tawh a, tourism lam pawhin hma a sawn chho leh ṭan tih a sawi. State tourism sector thuam chak a, ṭhalaite tana sum lakluh theihna tur hna tam zawk siam dan tur ngaihtuah tura State Tourism Board (STB) din turin state sorkar a ngen bawk. Arunachal Tourism Society awm mek aiah, state sorkar chuan tourism professional, stakeholder leh sorkar official-te awmna STB hi a din a ngai niin a sawi.