Tripura: BJP worker-ten Congress in-charge Ajay Kumar bei

Tripura Congress in-charge leh AICC general secretary Ajay Kumar chuan BJJP worker-ten an beihnaah na takin a hliam. Congress party worker dang 15 pawh an hliam bawk a ni.

Nilaini-a Election Commission of India (ECI)-in Tripura assembly inthlan neih hun tur a puan hnu lawkah, Congress party chuan motorcycle rally a buatsaih a, hei hi BJP worker-te chuan an lo bei a ni.

Ajay Kumar bakah Tripura Congress chief hlui Gopal Roy leh party hruaitu dang pahnih, Ratan Das leh Bijay DAs-te pawhin hliam an tuar a, damdawi-inah dah an ni.

He pawikhawihna thlenna hi Tripura west district-a Majlishpur assembly constituency huamchhung, Jirania hmunah a ni a, Congress party mi leh sate beih an nih lai hian Tripura BJP minister Sushanta Chowdhury pawh a awm niin an sawi.

Ajay Kumar chuan, "Bike rally kan huaihawt a, Majlishpur kan thlenin minister Sushanta Chowdhury chu rally hmaah rawn kalin min lo dan a tum a, amah zuitute chuan lungin min rawn tawng zui a ni, " tiin tlan an tum chu BJP mi leh sate chuan rod nen an bei zui leh bawk niin a sawi.

Rally neihna tur atan hian thuneitute hnenah phalna pawh an lak vek thu Kumar chuan a sawi a ni. Congress MLA Sudip Roy Barman chuan EC hnenah Congress worker-te laka tharum thawhna thleng chu ngaihven turin a ngen a, FIR pawh thehluh an tum tih a sawi.

Tripura chief electoral officer (CEO) Kiran Gitte chuan rally neihna party pahnih inkara buaina chhuak chungchangah complaint an dawn thu sawiin, thil awmdan chhui zui mek a ni, a ti.

Seat 60 awmna, Tripura assembly inthlan hi February 16-ah neih a ni dawn a, March 2-ah result puan a ni ang.