Meghalaya inthlan hun ruatah BJP an lawm lo Political party dangte erawhin ṭha an ti

Election Commission of India (ECI)-in Meghalaya state assembly inthlan hun tur atan February 27 a ruat a, hei hi state chhunga party tam zawkin ṭha an tih laiin BJP erawh an lawm lo.

Rorellai, National People's Party (NPP) leh United Democratic Party (UDP) bakah eptu pawl, TMC leh Congress party chuan ECI hun ruat chu ṭha an tih thu sawiin, inthlang tur pawhin an inpeih tih an sawi.

Hetih lai hian BJP erawh chuan inthlan puan hun leh, vote thlak ni inkar hla lutuk chu ṭha an ti lo tih sawiin, party liante tan voter-te thlemna hun remchang a tam dawn a ni, an ti. BJP state president Ernest Mawrie chuan, "Inthlan neih hun tur puan aṭanga thla khat leh a chanve dawn hnua vote thlak a ni chauh tur hi ṭha lo kan ti hle. Rorellai, ṭangrual pawlten voter-te thlemna hun an ngah phah dawn a ni," a ti.

BJP chuan inthlan neih tur atana an inbuatsaih zel thu leh, seat 40 chuangah candidate tur pawh an ngaihtuah tawh thu Mawrie chuan a sawi bawk. BJP hi NPP kaihhruai Meghalaya Democratic Alliance (MDA) sorkarah a tel a, mahse assembly inthlan lo awm turah political party dang thawhpuina tur engmah an la siam lo. Mawrie chuan inthlan hmaa thawhdunna lo siam lawk chu an duh lo tih sawiin, party mala an chuh tur thu leh, seat 10-15-ah hnehna an chan ngei a rin thu a sawi.