Kum 2022-a AP-a school enrollment rate 96.9% a tling

Arunachal Pradesh-in Annual Status of Education Report (ASER), 2022 a tihchhuahah, kum 2022 chhung khan an state-a naupang, kum 6-14 inkar school enrollment rate chu 96.9% a ni tih a tarlang. Kum 15 chhung chu kum 6-14 inkar school enrollment hi 96% chunglam vek a ni.

Hri leng vanga hun eng emaw chen school khar a ni chungin kum 2018 aiin kum 2022-ah school-a inziaklut hi an la pung zel a ni. Sorkar school bikah kum 2018-a kum 6-14 inkar school-a inziaklut hi 60.1% a nih laiin, kum 2022-ah 62.2% ah a pung bawk. Kum 10 chhung chu sorkar school-a kal hi an pung chho tawh a ni.

Kum 2006 khan Arunachal Pradesh-ah hian hmeichhe naupang, kum 11-14 inkar school kal lo hi 8.7% an awm a, mahse kum 2022-ah chuan school kal lo zat hi 3% ah a tlahniam tawh. Kum 2008-ah hmeichhe tleirawl, kum 15-16 inkar school kal lo 10% chuang awmin, nikum khan 6.4% ah a tlahniam tawh bawk.

Zirlai naupang, Class I-VIII inkar zingah private tuition class kal hi kum 2018-ah 23.1% an awm laiin 2022-ah 26.6% ah an pung. Tuition class kal hi sorkar school zirlai zingah 18.5% an awm laiin, private school-a kal 42.7% an awm thung.

State chhunga zirtirtute attendance pawhin hma a sawn a, kum 2018-a zirtirtute kal dan chawhrual hi 72.7% anih laiin, 2022-ah chuan 75.4% a ni. Hetih lai hian upper primary china zirlaite attendance erawh a tlahniam thung a, kum 2018-ah 78.3% niin, 2022-ah chuan 75.9% ah a tlahniam a ni.