Nagaland-a district 3-ah CrPC 144A puang

Election Commission of India-in Nagaland state assembly inthlan neih hun tur a puan hnuah, Dimapur police chuan inthlan muanawm tak a awm theihna atan thupek an tichhuak ve nghal.

Commissioner of Police leh District Magistrate Kevithuto Sophie chuan district pathum - Dimapur, Chumoukedima, leh Niuland-ah CrPC-a section 144A hnuaiah hriamhrei lam chi reng reng kawl leh kenchhuah khapna thupek a tichhuak. Thupek dang awm leh hma chu hei hi hman a ni ang.

Heng district pathuma armed licence holder-te chu February 10 hmaa an hnaih ber police station-ah an licence thehlut tura tih an ni bawk. He thupek zawm lote chu Arms Act,1959 hnuaiah an arms licence tihtawp sak an ni ang, tiin thuchhuah chuan a tarlang.

Nagaland chief election officer (CEO) V Shashank Shekhar chuan inthlanna dik leh felfai tak nei turin a inpeih tih a sawi a, police leh mawhphurtu hrang hrangte pawh an inbuatsaih ṭha tih a sawi. Voter tinten vote an thlak theihna turin ruahmanna siam a ni a, taksa lama rualbanlote tan pawh vote thlakna hmunah 'ramp' siam niin, voter-te pui tur volunteer an awm vek dawn tih a sawi. Inthlan vuakveta duty turin CRPF company 75 tirh an ni a, anni bakah company dang emaw zat tirh belh an ni leh dawn bawk.

CEO chuan ministry of health and family welfare thupek angin, zan dar 10 aṭanga a tuk zing dar 6 thleng loudspeaker hman khap a ni a, Covid-19 guideline pawh hman a ni dawn tih a sawi.