IIT-G in drone-flying school siamna tur inremna ziahpui

Indian Institute of Technology-Guwahati (IIT-G) chuan hmarchhak biala drone-based technology tihchak leh tihchangtlunna tur thawhpui turin Assam Electronics Development Corporation Ltd (AMTRON) leh RC Hobbytech Solutions Pvt. Ltd. (RCH) chu memorandum of understanding (MoU) a ziahpui.

MoU hian sector hrang hrang - agriculture, disaster management, wildlife conservation leh healthcare lama research leh manufacturing tihna tur pawh a huam tel dawn a ni. An thawhhona turah hian IIT-G campus-a drone flying school dinna tur pawh a tel. Commercial drone flying fresher course kalpuiin, hemi kaihhnawih advisory leh consultancy service pawh an kalpui tel dawn a, drone flying licence renew, commercial drone permit neihna turahte puiin, drone flying test nei tur zirlaite pawh an pui ṭhin ang.

He inremna hi IIT-G-a officiating director Prof. Paramswar K.Iyer, AMTRON managing director S.Sundar leh RC Hobbytech Solutions Pvt Ltd. co-founder Biswajit Dey-ten an ziak a ni. Prof. Iyer chuan pawl pathumte hian research leh development activity lamah theihtawp an chhuah dawn tih a sawi.

IIT-G leh a thawhpui turte hian Assam state chhunga disaster response management system tihhmasawnna turin hma an la bawk ang.