TIPRA Motha-in darkar 12 awh bandh huaihawt dawn

Tripura regional indigenous political party, Tipra Motha chuan January 18-a an party worker thattute man phutin, vawiin hian Dhalai district-a Kamalpur sub-division ah darkar 12 awh bandh an huaihawt dawn.

Tipra Motha hruaitu, Mary Debbarma chuan an party worker, Pranajit Namasudra thah a nih hnuah, a vuina hun an hman laiin thuneitu lamin an dang niin a sawi. Hei hi party worker lamin duh loin, official-te nena an innawrbuainaah Tipra Womens Federation worker eng emaw zatin hliam an tuar a ni, a ti.

Lungawi lohna lantira ngawirenga kawngzawh huaihawt an tum pawh thuneitu lamin an phalsak lo zel a, hei vang hian bandh neih mai hi an rel ta tih a sawi. Tualthahna thlenga inhnamhnawihte man thuai an phut thu chu ziakin thuneitute hnenah an thehlut dawn tih a sawi bawk.

Pranajit Namashudra hi Kamalpur sub-division hnuaia Bamanchhara khuaah January 18 khan BJP mi leh sate chuan hmanrua nena beiin an that a ni.

EC-in Tripura police officer 3 a hrem

Election Commission chuan West Tripura-a Congress party-in bike rally beih an nih chungchangah hma an lak ṭhat tawk loh avangin sub-divisional police officer (SDPO) a suspend a, officer in-charge (OC) pahnih a sawn bawk.

Kar liam taa Congress bike rally huaihawt hi BJP mi leh sa nia puhten beiin, Congress worker 15 in hliam an tuar a, an zingah hian AICC general secretary ajay Kumar pawh a tel. He buaina thleng kaihhnawihah hian police-te chuan FIR pathum ziaklutin, mi pariat an man tawh a ni.

Congress leh CPI(M) in kawng zawh

Tripura-a eptu party pahnih, Congress leh CPI(M) chuan Inrinni liam ta khan an state-a politics kaihhnawiha tharum thawhna thleng fo duh lohna lantirin Agartala-ah kawng an zawh. Assembly inthlan lo awm tur pawh dik leh felfai, langtlang taka kalpui an duh thu an sawi.

Rally-a telte hian tharum thawhna thleng ṭhin duh lohna thuziak hrang hrangte an keng a, tel an ṭhahnem hle. An state-ah politics kaihhnawihah eptu party-ten beih an tawk fo chu an duh loh thu sawiin, inthlan neih a nih hma ngeia boruak ṭha leh muanawm a awm an duh thu an sawi a ni.

Rally zawhah party pasarih - Congress, CPI-M, CPI, RSP, Forward Bloc, CPI (ML) leh Tripura People’s Party hruaitute chuan Tripura Chief Electoral Officer (CEO) Gitte Kirankumar Dinkarrao leh police official-te an hmu zui bawk.

Election Commission of India (ECI)-in kar liam ta Nilainia Tripura assembly inthlan neih hun tur a puan hnuah, state chhung hmun hrang hrangah politics kaihhnawihah buaina a chhuak tawh a ni. State assembly inthlan hi February 16-ah an nei dawn a ni.

Congress party hruaitu Sudip Roy Barma chuan Inrinnia rally an huaihawt hi political activity ni loin, state mipuiten boruak muanawm an duhna an thlawpzia lantirna a ni, tiin a sawi.