Meghalaya : Vawiinah Congress-in candidate puang dawn TMC-in party manifesto an tlangzarh dawn

Meghalaya state assembly inthlan neih tur atan political party hrang hrangte an inbuatsaih chho zel a, campaign pawh an nei ngawrh sawt tawh hle.

Congress party chuan vawiin hian seat 60 awmna, legislative assembly inthlan neih tur atana an party candidate list a tichhuak dawn. Congress party hruaitu zinga eng emaw zat chu party dangah an insawn avangin, candidate list tihchhuah tur pawh hian ngaihven a hlawh hle rin a ni.

Trinamool Congress (TMC) pawhin vawiin hian party manifesto an tichhuak dawn a, TMC general secretary Abhishek Banerjee-a'n a tlangzarh ang. Chief minister hlui, Mukul Sangma kaihhruai TMC hi boruak an neih len a, rorellai National People's Party (NPP) nen pawh an inbeih nat hle rin a ni bawk. NPP hi hmarchhak biala regional party zingah national party recognition nei awmchhun a la ni.

Meghalaya assembly inthlan hi February 27-a neiin, March 2-ah result puan a ni ang.

Inthlana duty tur hian central armed paramilitary forces (CAPF) pawhin Meghalaya hi an thleng tawh a ni.

Inthlan dawn hnaiha MLA zingah party dang zawm a, MLA aṭanga bang eng emaw zat an awm. Seat 60 awmna Assembly-ah hian MLA 47 an awm mek tih Assembly Commissioner and Secretary Andrew Simons chuan a sawi.

Meghalaya-ah hian vote nei mi 21,61,729 awmin, an zinga 10,68,801 chu mipa an ni a, hmeichhia 10,92,326 an awm bawk. Vote nei punna hi 2.36% a ni.

Vote nei thar, a ṭum khatna atana vote thlak tur mi 81,443 an awm a, kum 80 chunglam mi 22,658 an awm bawk a, an zinga mi 290 chu kum 100 tling tawhte an ni.