Tripura : Mamata Banerjee-i'n Feb 7-ah road show nei dawn

Trinamool Congress (TMC) hotu lu ber, West Bengal chief minister Mamata Banerjee chuan Tripura assembly inthlan neih turah an party tana campaign-in, February 7-ah road show a nei dawn.

Mamata Banerjee hian February 6-ah Tripura-ah kalin, February 7-ah road show hi a nei dawn a, hei hi thla thum chhunga hmarchhak bial a tlawh ṭum thumna tur a ni. January 18 khan Meghalaya-a North Garo Hills district tlawhin, nikum December thla khan Shillong a lo tlawh tawh bawk.

Tripura inthlan turah hian TMC chuan party mala chuh an tum a, assembly bial 60-ah candidate an siam vek dawn leh dawn loh erawh an la sawichiang lo. State TMC president Pijush Kanti Biswas chuan Congress-CPI(M) chu an thawhpui ve dawn lo tih sawiin, party pahnih thawkdunte dinhmun hi a ṭha dawn chuang lo niin a sawi. Hemi rual hian an thawhpui theih tur party dangte tan erawh an inhawng reng tih a sawi nghal bawk.

Biswas chuan party tana campaign tur hian TMC senior leader-te pawh an la kal belh zel dawn a, anni bakah Tollywood star-te pawh an kal dawn tih a sawi.

Tripura inthlan hi February 16 hian neih a ni dawn a ni.