Assam-ah AANLA helpawl member 46 inpe

Assam-ah tribal helpawl, All Adivasi National Liberation Army (AANLA) member 46 chu Pathianni khan an ralthuam kawlte nen thuneitute kutah an inpe.

Kum 2006-a din, AANLA hian tribal-te dikna chanvo humhalhna turin an bei tih an sawi. Nikum September thlaa Assam sorkarin state chhunga tribal helpawl pariatte remna leh muanna a awm theihna tura inremna a ziahpui zingah khan an tel a ni. Assam sorkar leh tribal helpawl pariatte chuan nikum September 15 khan New Delhi-ah inremna hi an ziak a, he hunah hian union home minister Amit Shah leh Assam chief minister Himanta Biswa Sarma-te pawhin an telpui a ni.

Sorkar nena peace agreement an ziah hma hian AANLA member 13 chu Karbi Anglong-ah an lo inpe tawh bawk.

Pathiannia khan hel 46-te hi Sonitpur district-a Dhekiajuli-ah police official-te hmaah an inpe a, an ralthuam kawl pistol pakua, rifle paruk leh a mute pawh an pe lut nghal a ni.

AANLA president D Nayak chuan sorkarin tea estate-a tribal-te dikna chanvo a humhalh sak zel ang tih an rin avang leh, an hmasawnna tur a ngaihtuahpui zel an beiseina avangin an inpe tih a sawi.

Nayak chuan kum 2012 aṭang khan sorkar nen inremna kawng zawngin inbiakna an nei ṭan tawh a, kum tam tak inbiakna an chhunzawm hnuah nikum khan inremna hi an ziak thei ta tih a sawi. He inremna an ziahah hian Adivasi hnamte dikna chanvo chu humhalh sak zel a nih tur thu pawh ziah a ni, a ti.