Meghalaya-a rorellai, National People's Party (NPP) chuan an tihdan phung angin, North Garo Hills-a Kharkutta constituency-a Adokgre ground aṭangin assembly inthlan neih tur atana campaign chu Thawhṭanni khan an ṭan. 
Election rally hi Chenangre stadium hawn tharah buatsaihah niin, NPP mi leh sa 10,000 chuang an pungkhawm. He hunah hian Garo Hill aṭanga party candidate turte pawh an kim vek a, an zingah hian chief minister Conrad Sangma, deputy chief minister Prestone Tynsong, Ampareen Lyngdoh leh James Sangma-te pawh an tel. 
Kharkutta bialtu, NPP MLA Rupert Momin chuan NPP kaihhruai sorkarin an state tana hmasawnna a thlen hrang hrangte tarlangin, an hnathawh avangte hian inthlan lo awm turah an party chuan thuneihna an chan phah leh ngei dawn a, majority pawh an neih phak ngei tur thu a sawi. 
Songsak biala chief minister hlui, TMC hruaitu Mukul Sangma nena inkhing tur, MLA Himin D Shira pawhin thu sawiin, inthlanah hian tu pawh khing dawn se, NPP sorkar hnathawh ṭhatte avangin tumah a huphurh lo tih a sawi. NPP kaihhruai sorkarin FOCUS, FOCUS Plus leh YESS programme a kalpuite chuan state pumah nghawng ṭha tak a nei zel a, mi tam takin an chhawr a ni, a ti.
Tura MP Agatha Sangma chuan mipui kalkhawmte hnenah a pa, PA Sangma-a'n Adokgre mipuite a ngaihhlut thute sawiin, Adokgre statium hawn thar pawh chu hmu ve se a chhuang hle ang, tiin a sawi. State chhunga hmasawnnate chhunzawm zel a nih theihna tura NPP in majority a neih theihna turin mipuiten an vote leh vek a rin thu a sawi bawk.