Assam sorkarin child marriage dang turin hma la dawn

Assam sorkar chuan kumtling lo naupang inneih tir, child marriage kalpui ṭhin dang turin beihpui a thlak dawn.

National Family Health Survey-5 (NFHS-5) data tihchhuahah, Assam-a hmeichhia, kum 20-24 inkar zinga 31.8% chu kum 18 an tlin hmaa pasal neihtir an ni tih tarlan a ni. Hetih lai hian ram pumah kum 18 tlin hmaa pasal neih tir hi 23.3% a ni thung. Survey neih lai hian Assam-a hmeichhia, kum 15-19 inkar zinga 11.7% chu fa nei tawh, nau pai mek an ni tih tarlan a ni bawk.

NFHS-5 data tihchhuah hnua state cabinet meeting chuan, state chhunga kum tling loa inneihna thleng ṭhin dang tura hma lak nghal a rel a, Assam police-te chu ni 15 chhung ngeia hma la ṭan turin a ti nghal bawk a ni.

Chief minister Himanta Biswa Sarma chuan, "Police-te chuan state puma hma an la zui nghal dawn a, hnam leh sakhua thliar a ni dawn lo a, kum tling loa inneih tirtute chungah action lak a ni. POCSO (The Protection of Children from Sexual Offences) Act, 2012 leh Prohibition of Child Marriage Act 2006 hnuaiah thubuai pawh ziahluh nghal zel a ni ang," a ti.

Assam-ah hian naupang inneih tir, child marriage hi nuai khat vel an awm nia report a ni. Official data aṭanga a lan danin, naupai kaihhnawih leh nau chunga thi zinga hmun lia ṭhena hmun khat chu kum 20 leh a hnuailam an ni.