Tripura : TIPRA hotuin party-a kawhmawh bawlte chhuak turin ti

Tripura assembly inthlan neih tura atan an inbuatsaih mekah, TIPRA hotu Pradyot Kishore Debbarman chuan party chhunga kawhmawh bawl hruaitute chu an lungawi lo a nih chuan party chhuahsan mai turin a ti.

TIPRA chairman chuan, "Mi ṭhenkhat MLA-a siam tum ringawta bei kan ni lo. Greater Tipraland din kan phutnaah kan la ding nghet reng a ni. Kan thuthlung aia assembly inthlan-a thlan tlin nih ringawt ngai pawimawh zawk hruaitute chuan party hi chhuahsan mai rawh se. Party dangte pawhin thawhpuia min sawmin, chanvo ṭha tak takte pawh an tawktarh a ni. Mahse kan thil phut kaltlangpui theih lohna tur chu kan thawhpui duh lo a, kan duh ang min duhpui theih loh chuan party mala inthlan hmachhawn ka thlang zawk a ni," tiin a sawi.

Political party dang an thawhpui dawn tia thuthang tam tak awm thu sawiin, Debbarman chuan thawhpui turin tumah inremna an la siampui lo a, an party candidate pawh an puan thuai tur thu a sawi. Party dangin an thawhpui duh a nih chuan, Greater Tripraland an phutna chu an thlawp a ni tih ziak ngeia an dah a ngai ang, a ti.