Meghalaya NCP MLA awmchhunin Congress a zawm

Assembly inthlang tura inbuatsaih mek, Meghalaya-ah Nationalist Congress Party (NCP) MLA awmchhun, Saleng Sangma chuan Thawhṭanni khan an party chhuahsanin Congress party a zawm leh.

Saleng Sangma hi Congress party-a awm laiin an party hruaitu ni ṭhin, Dr Mukul Sangma chuan a suspend a ni. Mahse Mukul Sangma pawh hian Congress hi chhuahsanin Trinamool Congress (TMC) a zawm tawh a ni.

Sangma chuan Congress party chu a chhuahsan ni loin, Mukul Sangma zawk chuan a hnawtchhuak tih a sawi. "Congress party aṭanga min hnawtchhuaktu kha tunah party-ah a awm zui tawh lo. Mi dawihzep tak a ni a, Congress-ah rinawm tawh loin TMC a zawm leh si a ni," a ti.

Congress aṭanga hnawhchhuah a nih hnuah BJP zawm a tum deuh a, mahse Kristiante beihna thleng ṭhin avang leh, he thil hi political party - TMC leh a dangte'n politics khelhna hmanruaa an hman zui avangin Congress party-ah bawk kir leh chu a duh ta tih Sangma chuan sawi. "BJP chu party ṭha tak ni mah se, Kristian society nena inmil lohna eng emaw a awm a ni. Kristian tamna state kan ni a, hei vang hian mipuite rilru tina zawnga awm ka duh lo," tiin BJP a zawm duh lohna chhan a sawi bawk.