Assam leh Manipur-ah Covid-19 positive awm belh

Manipur state-a Covid-19 kai pahnihte enkawl dam an nih aṭanga ni 42 chhung hri kai an awm loh hnuah, Ningani tlai khan hri kai pakhat hmuh belh leh a ni. 

Hri kai hmuh thar hi Imphal East district-a mi niin, Mumbai aṭanga motor hire-a haw a ni. Manipur a thlen hnu hian quarantine centre-ah awmin, a sample test chu Ningani zan khan Covid-19 a kai tih hriat a ni ta a ni. Hri a kai tih hriat a nih hnu hian JNIMs hospital-a isolation ward-ah dah nghal a ni tih doctor-te chuan an sawi. 

Manipur hian hmun danga an state mi tangkhangte chu a hruai haw ṭan mek a, Nilaini khan special train hmangin Chennai aṭangin mi 1,141 phurh thlen an ni tawh a, nimin khan Punjab aṭanga haw mi 1,188 chuan Imphal an thleng bawk. Ningani khan Bengaluru aṭangin special train hmangin mi 1,450 in Manipur an pan bawk a ni. 

Assam-ah pawh Ningani khan Covid-19 kai pasarih hmuh belh leh an ni a, an vai hian Mumbai aṭanga haw an ni. 

State health minister Himanta Biswa Sarma chuan hri kai hmuh belhte hi Mumbai aṭanga bus-a haw, damlo pathum leh awmpuitu mi pali an ni tih a sawi. An zingah hian naupang kum 13 mi pawh a tel.  Guwahati an thlenin quarantine centre-ah dah nghal an ni a, an sample test a nih hnuin hri an kai tih hi hriat a ni ta a ni, a ti. Guwahati-a hian ni hnih chhung lekin hri kai hmuh belh hi mi 22 an awm a ni. 

New Delhi aṭanga rel-a haw zinga pali pawh symptom an neih avangin damdawiina isolation ward-ah dah niin, an test result nghah mek a ni. 

Minister chuan hmun danga tangkhang mi 4,000 chuang chu Assam-ah an kir tawh tih sawiin, an zinga mi 12 chuan hri hi an kai tih hriat a ni tawh tih a sawi bawk. Assam-ah hian Covid-19 kai hmuh tawh hi mi 86 an tling tawh a ni.