ULFA-I, NSCN-K leh CorCom-in Republic Day boycott

United Liberation Front of Asom-Independent (ULFA-I) leh National Socialist Council of Nagaland (NSCN-K) chuan vawiina Assam-a Republic Day lawmna chu an boycott thu an sawi.

Helpawl pahnite hian Thawhlehni khan thuchhuah inṭawm siamin, January 26 zing aṭanga zan dar 6 thleng Assam state pumah 'total shutdown' an kalpui dawn tih an sawi. State mipuite chu Republic Day boycott turin an sawm nghal bawk.

Hetih lai hian Guwahati leh state chhung district hrang hrangah helhoin pawikhawihna an thlen venthawn thilah venhimna tihkhauh a ni a; rel station, airport, oil field leh sorkar hmun pawimawh dangahte venhim hna thawktu ṭhahnem tak dah an ni.

Helpawl paruk intelkhawmna, Coordination Committee (CorCom) pawhin Manipur-ah Republic Day hi an boycott thu sawiin, nizan zanlai aṭang khan darkar 18 awh tur shutdown an puang.

CorCom-ah hian helpawl paruk, -KCP, KYKL, PREPAK, PREPAK (Pro), RPF, leh UNLF-te an tel. Thuchhuah an siamah, Manipur mipuite state puitling an nih ringawt chu lawmna tur a awm lo a, Republic Day lawmna lo zawm ve pawh a ṭul lo niin an sawi.

CorCom bakah National Revolutionary Front, Manipur (NRFM) pawhin Republic Day an boycott bawk a, January 25 zanlai aṭanga zanin dar 6 thleng state pumah nawrh an huaihawt.