Sikkim CM hlui Chamling-a convoy beih a ni

Sikkim chief minister hlui, Pawan Kumar Chamling leh a party, Sikkim Democratic Front (SDF) convoy chu Namchi district-ah rorellai, Sikkim Krantikari Morch (SKM) mi leh sa nia sawiten an bei a, lungin an lo tawng a ni.

Gangtok-a party headquarters-a media mite a kawmnaah, SDF thupuangtu JB Darnal chuan he thil hi Namchi khaw bul, Denchung-a thleng a ni tih sawiin, "Convoy hi darkar eng emaw zat an lo dang a ni. Pawikhawihna a thleng chung hian hemi biala police inspector, station house officer leh Namchi superintendent of police-te chuan mawhphurhna an la duh lo a, Namchi PS ni loin Jorethang Police Station lam kut tuar a ni an ti tlat a ni," a ti.

Hetiang thil hi a thlen ṭum khatna a ni lo tih sawiin, Darnal chuan SKM mi leh sate chuan an la beih leh fo pawh a rin thu a sawi. Dan leh thupek kenkawh chu thuneitu lam mawphurhna a ni, a ti. CM convoy beitute hian SKM flag an keng a, PM hlui Chamling chu tihnat ngei tumin an che niin a sawi bawk.

Chamling-a convoy beih a nih hnu hian Jorethang police station-ah FIR thehluh a ni a, police-te chuan mi pakhat manin a hnuah an chhuah zui leh nghal a ni. SDF chuan Namchi police station chuan an complaint thehluh chu an la ziakluh sak loh thu an sawi bawk.