Manipur BJP hruaitu kahhlum a ni; Tualthattu police kutah a inpe

Manipur BJP hruaitu, Laishram Rameshwor Singh, kum 50 mi chu Thawhlehni khan Thoubal district-a a chenna inah kahhlum a ni. Tualthattu nia puh, Aykpam Keshorjit chu police kutah a inpe tawh.

Police-te chuan he pawikhawihna hi Thawhlehni chawhma dar 10:20 - 11:30 inkar vela thleng niin an sawi. Pawikhawihtute hi silai kengin Thoubal Kshetri Leikai-a Rameshwor-a inah an lut a, a awmah an kap a ni. Imphal-a Raj Medicity Hospital panpui ni mah se, Thawhlehni chawhnu dar 1 vel khan a hliam tuar loin a thi.

Manipur BJP ex-servicemen cell-a general secretary, Rameshwor hi Indian Army hlui niin, Rashtriya Swayamsevak Sangh (RSS) member a ni bawk.

Pawikhawihna thlenna bula awmte chuan Rameshwor beitute hi XUV var, number plate pawh nei loah an kal niin an sawi a, silai an kah hnuah an tlanchhe zui nghal a ni.

Police-te chuan motor-ah hian mi pahnih an chuang tih sawiin, Thawhlehni tlai khan a driver zawk chu an man nghal a ni. Hemi hnu, Thawhlehni zan khan tualthattu ber nia puh,Aykpam Keshorjit chu Imphal west district-a police station-a officer-in-charge kutah a inpe zui ve leh bawk. Keshorjit hian .32 licensed pistol leh magazine pahnih, .32 caliber bullet pakua leh mobile handset pakhat a pe lut niin a police-te chuan an sawi. Keshorjit hi kum 46 mi niin, Imphal west district-a Haobam Marak Irom Leikai-a cheng a ni.