Assocation of Democratic Reforms (ADR) in report a tihchhuah tharah, Nagaland-a MLA ṭanglai 60 zinga 75% chu mi hausa tawntaw, crorepati a ni. Hetih lai hian thubuai rip tak, serious criminal case nei 3% an awm bawk. 
ADR leh Nagaland election watch chuan kum 2018 assembly election dawn leh a hnua by-poll neiha candidate-te affidavit thehluh aṭangin, MLA 60-te chanchin hi an zirchiang a ni. 
MLA thubuai rip tak nei hi Nationalist Democratic Progressive Party (NDPP) MLA pakhat leh BJP MLA pakhat an ni. 
Hausa tawntaw, crorepati hi 45 (75%) awmin, MLA 60-te hausakna hi chawhrualin pakhatin Rs vaibelchhe 5.14 hu nei anga chhut a ni. NDPP MLA 42-te hausakna hi chawhrualin Rs vbc 5.73 a ni a, BJP MLA 12-te hausakna hi chawhrualin Rs vbc 3.68, NPF MLA palite hausakna hi chawhrualin Rs vbc 5.34 leh, independent MLA pahnihte hausakna hi Rs vbc 1.13 ve ve a ni bawk. 
MLA zinga 19 chu zirna lamah Class 8 -12 inkar a ni a, 40 chu graduate leh a chunglam niin, MLA pakhat chu ziak leh chhiar thiam lo a ni thung. MLA 21-te chu kum 51-60 inkar niin, kum 61-70 inkar 15 leh kum 41-50 inkar 11 an awm. 
Nagaland assembly inthlan hi February 17 ah neih a ni dawn a, March 2-ah inthlan result puan a ni ang.