Covid-19 Hmarchhak dinhmun

Arunachal Pradesh-ah hri kai hmuh thar mi 83 awmin, an zinga mi 14 chu security force mi leh sa niin, healthcare worker pasarih an tel bawk. AP-ah Covid-19 kai hmuh chhuah tawh hi 1,673 an ni tawh. 

Inrinni khan hri kai enkawl zinga 51 chu an dam tawh avangin hospital aṭangin chhuah tir an ni. Hri kai zinga pathumin an thihpui tawh a, 969 dam tawhin enkawl mek 701 an la awm. Nimin thleng khan sample 86,288 test a ni tawh a ni. 

Assam-a hri kai thar zingah Dibrugarh-a Assam Medical College&Hospital principal a tel. Inrinni khan Assam-ah hri kai hmuh thar mi 1,457  an awm a,  an zinga mi 275 chu Guwahati khawpuia mi an ni. Assam-a Covid-19 awm hmuh tawh hi mi 41,726 an tling tawh a ni. Hri kai zinga mi pathum chu Inrinni khan an thih belh leh a, hripui thihpui hi mi 101 an awm tawh bawk. 

Hri leng hian ziaawm lam la pan lo mah se, Assam sorkar chuan September 1 aṭangin state chhung zirna inte hawn tumin rua­hmanna a siam a, mahse thutlukna erawh chu sorkar laipui zai ngaiin siam a la ni ang.  Hemi rual hian zirtirtu leh zirna ina thawktu zawng zawngte chu August 23-30 chhungin hri an kai leh kai loh test vek an ni ang. 

Manipur-ah Inrinni liam ta  khan hri kai hmuh chhuah tam ber ni a thleng a, mi 135 in hri an kai tih hriat a ni a, an zingah hian security force mi leh sa 80 an tel. 

Hri kai hmuh thar zingah hian tualchhung mi, hmun danga zin chhuahna nei lo mi 37 an tel leh tih additional health director Dr K Sasheekumar Mangang chuan a sawi. Hei vang hian mipuia hri darh zel tur venna atan contact tracing ngawrh taka neih  nghal a nih thu a sawi bawk. Manipur-a hri kai hmuh chhuah tawh hi mi 2,756 an tling tawh a, an zinga 1,699 chu enkawl dam ni tawhin, mi parukin an thihpui tawh thung. 

Meghalaya-ah Covid-19 kai hmuh chhuah chu  mi 856 an tling tawh. 

Inrinni khan hri kai hmuh chhuah belh mi 33 an awm leh a, anni nen hian hri kai mek hi 631 an awm. Hri kai hmuh thar zingah BSF sipai pali bakah armed force danga mi 10 an tel. Hemi ni vek hian hri kai enkawl zinga mi pasarih chu an result a negative tawh avangin damdawiin aṭangin chhuah tir an ni. Hri kai zinga mi 220 enkawl dam an ni tawh a, mi panga in an thihpui tawh a ni. 

Nagaland-ah Inrinni khan hri kai hmuh chhuah belh mi 138 awmin, an state-a ni khata hri kai hmuh chhuah tam ber ni a ni. 

Covid-19 kai hmuh chhuah tawh hi mi 1,831 awm tawhin, an zinga 640 chu enkawl dam an ni tawh. Hri kai mek 1,191 awmin, mi paliin he hripui hi an thihpui tawh a, hri kai hmuh tawh zinga mi pahnih chu state dangah hruai an ni bawk. Health department-in a tarlan danin, an state-a hri kai hmuh chhuah zinga naupang ber chu naute, kum khat mi a ni a, a upa ber chu kum 94 mi a ni thung. 

Sikkim-ah Covid-19 kai hmuh chhuah 650 an awm tawh a, an zinga 269 chu enkawl dam ni tawhin mi pakhatin a thihpui tawh bawk. 

Inrinni khan hri kai hmuh chhuah belh mi 11 an awm a, an vai hian East Sikkim district mi vek an ni. State chhunga East Sikkim chu hri kai hmuh tamna ber niin mi 464 an awm a, South-ah mi 143, West-ah mi 42 leh North Sikkim district-ah mi pakhat a awm bawk a ni. 

Tripura state-ah Inrinni khan hri kai hmuh chhuah belh mi 250 an awm a, anni nen Covid-19 kai hmuh chhuah hi mi 5,248 an awm tawh. Inrinni vek khan hri kai pathum an thih belh leh a, he hri vanga thi hi mi 24 an tling tawh a ni. 

State sorkar chuan kar liam ta khan hri darh tur venna atan mipuite hriselna dinhmun endik runpui a nei. Education minister Ratan Lal Nath chuan kar liam ta ni nga chhungin health worker-te chuan chhungkaw 8,72,609-te tlawhin screening an neih sak hman tih a sawi. Survey team pawhin chhungkaw  23,869 tlawhin, mi  19,726 sample an test sak bawk. Hetih lai hian mi 4,143 chuan Covid-19 test neih an duh lo thung.  Tripura-ah hian sample 1,72,648 test a ni tawh a, mi maktaduai khatah mi 42,924 test ang an ni a, India ram state zingah test rate nei ṭha ber zingah a tel.