Central team-in Tripura tlawh

Tripura-a Border Security Force (BSF) camp-a coronavirus a darh dan zirchiang turin Ningani khan member pathum awmna central team-in Agartala an thleng. 

Central team hi  North Eastern Indira Gandhi Regional Institute of Health & Medical Sciences (NEIGRIHMS)-a Department of Community Medicine head, GK Medhi-a'n a ho a ni. BSF camp-a sipai, official leh an chhungte eng emaw zatin hri an kai darh dante an zirchiang dawn a ni. 

Tripura health department official chuan central team hian an state an thlen hnuah video link kaltlangin union health and family welfare ministry leh  National Centre for Disease Control (NCDC) official-te chu meeting an neihpui nghal tih a sawi. 

Nimin khan Dhalai district-a Ambassa khuaa BSF batta­lion pahnih, 86th leh 138th head­quarters-te an tlawh nghal a, NCDC leh ICMR (Indian Council of Medical Research)  official-ten an ṭawiawm a ni.  Headquarters pahnihte hi union health ministry chuan red zone-ah a lo puang tawh a ni. 

May 2 aṭang khan Tripura-ah hian Covid-19 kai hi mi 152 hmuh an ni tawh a, an zingah hian BSF sipai 126 telin, an chhungte 25 an tel a, an ei siamtu civil mi pakhat a tel bawk.