Tripura : Left-in seat 46-ah chuh dawn, Congress tan seat 13 an dah

Tripura assembly inthlan lo awm tur atan Left Front chuan Nilaini an candidate tur an puang.

Left Front hian assembly seat 60 aṭangin seat 46-ah chuh an tum a, CPIM-in seat 43-ah candidate siamin, CPI, RSP (Revolutionary Socialist Party), leh AIFB (All India Forward Bloc) chuan seat khat ṭheuh an chang. Congress party tan seat 13 an dah a ni.

CPI-M leh Congress party hian inthlan lo awm turah thawhdun an tum a, mahse seat insem chungchangah hian an inlungrual thei lo nia sawi a ni. Congress party hian candidate tur an la puang ve lo a, eng angin nge candidate an siam ve dawn an la sawilang lo.

Left Front hian independent candidate, Ramnagar biala ding tur, civil rights activist Puroshattam Roy Barman chu an thlawp dawn tih an sawi bawk. Candidate list tihchhuahah hian Left MLA nilai pariat chu telh an ni lo a, an zingah hian chief minister hlui Manik Sarkar pawh a tel.

Agartala-a party headquarters-a press conference an neihah Left Front convener Narayan Kar chuan candidate turte hi a puang a, "Candidate tur zingah hian hmel thar mi 24 an awm a, hmeichhia pahnih an awm bawk a ni," a ti. Candidate zinga buk rit deuh tura rinte chu CPIM state secretary Jitendra Chowdhury, minister hlui Manik Dey, state committee member Pabitra Kar, TTAADC chief executive member Radhacharan Debbarman, minister hlui Ratan Bhowmik leh Bijita Nath-te an ni.

Ven uluk ngai zual polling booth 1,100 awm

Assembly inthlan neih turah hian vote thlakna tur polling booth 3,328 siam a ni a, heng zinga 1,100 chu ven uluk ngai, 'vulnerable' category-ah dah an ni tih poll official chuan a sawi.

Chief electoral officer (CEO) Gitte Kirankumar chuan kum 2018 assembly inthlan leh 2019 Lok Sabha inthlanpui behchhanin, polling booth 1,100 chu vulnerable category hnuaiah dah an ni a, heng zinga 28 chu buaina chhuah hlauhawm zualna, 'critical'-ah dah an ni bawk a ni, a ti.

Sorkar laipui chuan inthlan vuakveta duty turin paramilitary force company 200 a tir tawh bawk.