Meghalaya : BJP hruaituin Bernark Marak tana phuba lak tiam
BJP national general secretary, BL Santosh chuan Meghalaya-a BJP hruaitu, South Tura MDC Bernark Marak-a dinhmun tihchhiat tuma beitute chu chhanna pek a, phuba lak a tiam.
Meghalaya assembly inthlan neih tura BJP candidate turte meeting neihpuiin BL Santosh hian Tura a tlawh a ni. Meeting-ah hian co-in-charge BJP Northeast Rituraj Sinha, Assam deputy speaker Dr Numal Momin leh BJP state president Earnest Mawrie-te pawh an tel.
Meeting zawha chanchinthar lakhawmtute an kawmnaah, BJP hruaitute chuan February 2-ah constituency tina an party candidate list chu tihchhuah a ni dawn tih an sawi.
Party worker-te nen an inhmuhkhawmnaah, Santosh chuan state thuneihna hmanga politics lama Bernard Mark dinhmun tihchhiat tuma beitute chungah, politics hmang vekin phuba lak a ni ang, a ti.
Santosh chuan, "Kum 2010-11 khan Congress party chuan Amit Shah tihchhiat tumin an lo bei tawh a, jail-ah hial a tang a ni. Mahse tuna Amit Shah-a dinhmun chu eng nge a ni tih in hre vek a, hetiang bawk hian Marak tihchhiat tumte pawh zirtirna pek an ni ang, eng mi pawh ni se," tiin a sawi.