NDPP leh BJP seat insem dan thlak danglam a ni dawn lo : CM Rio

Nagaland assembly inthlan neih turah Natianolist Democratic Progressive Party (NDPP) leh Bharatiya Janata Party (BJP) thawkdunin seat insem dan tura inremna an lo siam tawh chu thlak danglam a ni dawn lo, tih NDPP hotu leh chief minister Neiphiu Rio chuan a sawi.

NDPP leh BJP hian assembly seat 60 awmah seat insem dan tur hi tifel tawhin, NDPP lamin seat 40 leh BJP-in seat 20 chang turin inremna an ziakfel tawh a, hei hi central lama BJP hruaitute pawhin an pawmpui a ni. Hetih lai hian state chhunga BJP member-te chu seat insem danah hian an lungawi lo a, seat 30:30 ah insem phutin Kohima-a an party office kawtah lungawi lohna an lantir a ni.

CM Rio chuan party pahnihten inremna an lo siam tawh hi tihdanglam a ni dawn lo tih sawiin, inremna an siam dawn pawhin party pahnih mi leh sate rawnin an awm ve vek a, hei vang hian an inremna siam tawh chu hman a ni ang, a ti.

Rio chuan NDPP leh BJP hian constituency an chan tur erawh an la tifel lo a, tun thla chhunga tihfel hman tum a ni tih a sawi bawk. Seat insemna tura inremna an siam tawh avangin, party pahnih thawkdunte hi an indinthuah dawn lo a, bial tinah theihtawpin an inṭawiawm dawn tih a sawi.

Nagaland state khawchhak lam biala state hran, Frontier Nagaland din phuttu, Eastern Nagaland People's Organisation (ENPO)-in an member-te vote thlak lo tura an ngen chungchangah Rio chuan sawi tur a nei lo tih a tarlang. Hemi rual hian democracy ramah, mipui sorkar a dinna turin an aiawh tur chu mipuiten an thlanchhuah ngei a ngai a ni, a ti. Khawchhak lam bial hnam pasarih, state hran an phutna nawrna atana February 27 assembly inthlana tel an tum loh thu sawitute pawhin boruak ṭha tak an rawn siam leh a beisei thu a sawi bawk.

Nagaland assembly inthlan, February 27-a neih tura atana chuh tumte tan January 30 thleng nomination paper thehluh theih a ni ang. Inthlan result hi March 2-ah puan a ni ang.