SDF-in Sikkim-a President's rule puan phut

Sikkim-a eptu party, Sikkim Democratic Front (SDF) chuan governor Ganga Prasad hnenah memorandum thehlutin, Sikkim Krantikari Morcha (SKM) sorkar hnuaia an state-a dan leh thupek dinhmunte a chhe hle tih sawiin, President's rule puang turin an ngen.

Lok Sabha MP hlui, PD Rai kaihhruaiin SDF palaite hian Nilaini khan Raj Bhavan-ah Governor hi hmuin, memorandum hi an thehlut a ni.

PD Rai chuan, Governor hnenah hian ngenna hrang hrang an siam bakah, Constitution-a Article 371 (F)-in Sikkim mipuite himna leh dikna chanvo a pekte humhim zel tura an ngen thu a sawi. Hei bakah hian kum 2024-a state assembly inthlan an neih tur pawh felfai leh thianghlim taka neih a nih ngeih theihna tura hma la turin an ngen bawk.

SDF hruaitute chuan rorellai, SKM worker-te chuan tun kar tir lam khan South Sikkim-ah SDF mi leh sa, programme hmang tura kalte chu an bei a, mi 15 in hliam an tuar tih an sawi. Mahse SKM chuan thuchhuah siamin an puhna hi an pha a, SDF chuan an state-ah kum 25 thuneihna an chelh chhungin mipuite leh politics lama an khingpuite hrehawm takin an siam fo a ni, hei hi an tihdan phung a ni, an ti ve thung.