Ruihhlo dona kawnga theihtawp chhuahpui turin AP CM-in mipuite sawm

Arunachal Pradesh chief minister Pema Khandu chuan a kaihhruai sorkarin ruihhlo do hna a thawh mekna leh, ruihhlo hmansualna laka ṭhalaite veng tura hma laknaah state mipuite chu theihtawp chhuahpui turin asawm.

Chief Minister Khandu chuan, "Ruihhlo laka fihlim Arunachal siam tumin kawng hrang hrangin hma kan la mek a ni, mahse heng hmalaknate hian department hrang hrangte leh, a pawimawh berah mipuite thawhpuina ṭha a mamawh a ni," a ti.

Ruihhlo do hna thawhnaah special 'anti-narcotics task force' din a ni a, ruihhlo tawlh leh zuarte danchah a nih theihna tura mipuiten information an pekna tur, 'narcotic helpline' pawh din a nih thu CM chuan a sawi.

Poppy chinna pawh tihrem tura hma lak zel a ni a, Lolit district-a Medo khuaa poppy chingtute eizawnna dang siamsak a, mai chinna hmun hlawhtling tak an siam chhoh dante pawh Khandu chuan a tarlang bawk. Poppy chin bansan a, sum chang thlai hrang hrangte ching turin thurawn a pe bawk a ni.