TRIPURA: BJP-in candidate list thawh khatna a tichhuak

BJP chuan Inrinni khan Tripura assembly inthlan tura an party candidate an puang.

A thawh khatna atan assembly bial 60 zinga bial 48-a candidate list an tichhuak a, state MP leh union minister nilai Pratima Bhoumik pawh Dhanpur bialah a ding dawn a ni. Chief minister Manik Saha chu Town Bordowali ah a ding ang.

Kum 2018 inthlanah khan BJP chuan kum 25 zet thuneihna lo siam tawh Left Front chu hnehin sorkar thar an siam a ni. Tun ṭum inthlan turah hian regional party ṭhangduang tak, TIPRQ chu thawhpui tumin inbiakna neihpui mah se inremna an siam thei ta lo a ni. TIPRA Motha hotu, Padyot Kishore Debbarma chuan Greater Tipraland state hran an phut chungchang thlawp thei lo chu an thawhpui dawn lo tih a sawi.

Eptu party pahnih, CPI(M) leh Congress party chuan thawhdun an tum a ni.

BJP-in candidate list thawh khatna a tihchhuahah hian mi 48 zinga 11 chu hmeichhia an ni a, 25% dawn an tling pha. Candidate zinga 15 chu BJP ticket-a an din ṭum khatna tur a ni a, hetih lai hian MLA ṭanglai zinga paruk erawh telh an ni lo thung.

State BJ president Rajib Bhattacharjee chuan bial 12-a candidate tur pawh an puang leh thuai dawn tih a sawi. Bial 12 zinga a tam zawk hi tribal seat an ni.

Kum 2018-a Tripura assembly inthlanah khan BJP hi vote tla aṭanga 43.59% hmuin seat 36 an la a, seat la hnem ber niin party malin sorkar an siam pha. Mahse Indigenous People's Front of Tripura (IPFT) nen thawk dunin ṭangrual sorkar an siam a ni.