Meghalaya : Congress-in candidate list tichhuak kim tawh; BJP tan PM Modi a campaign dawn

Congress party chuan Meghalaya assembly inthlan neih tura party candidate list a tichhuak kim ta.

January 25 khan Meghalaya Congress chuan candidate list thawh khatna tichhuakin, assembly bial 60 zinga bial 55-a party ticket-a ding turte a puang a ni. Hemi hnu hian party central election committee (CEC) in a pawmpui hnuah candidate panga dang hming hi an puang leh a ni.

Congress party candidate tur zinga 80% hi party ticket-a an din ṭum khatna tur a ni tih Meghalaya Congress president Vincent H Pala chuan a sawi. Star campaigner hran an neih dawn loh thu leh, political rally lian pawh kalpui an tum lo tih sawiin, voter-te nena inpawhna ṭha zawk siam turin local community level-ah rally tenau zawkte siam ṭhin an tum tih a sawi.

Prime minister Narendra Modi chuan February chawlhkar hnihnaah BJP tana campaign turin Meghalaya hi a tlawh dawn. February 27-a inthlan an neih turah, Meghalaya-a BJP star campaigner 20 zingah hian union minister te - Amit Shah, Rajnath Singh, Smriti Irani leh Nitin Gadkari-te pawh an tel a, anni pawh hian an tlawh thuai dawn tih state BJP president Ernest Mawrie chuan a sawi. BJP sorkarna state-a chief minister-te pawh an campaign dawn bawk.

Mawrie chuan PM zin hun tur tak hi tihchian a la ni lo a, February 11-12 vel an tinzawn tih a sawi a, Kahis, Jainti leh Garo hills-ahte rally hrang hrang a telpui dawn a ni, a ti. BJP hian an candidate list an la puang lo a, February thla tirah puan an tum tih sawiin, hmeichhe candidate pawh 10 telh an tum tih a sawi.