Nagaland : NDPP-in BJP tan urban seat 4 dah remti

Nagaland assembly inthlan awm tura rorellai, National Democratic Progressive Party (NDPP) leh Bharatiya Janata Party (BJP)-ten seat insem dan tura inremna an siamah BJP member-te an lungawi loh avangin, NDPP chuan BJP chanpual turah hian urban seat pali pek tel an remti.

Party pahnih thawkdunte hian kum 2018 inthlan dawna seat an insem dan, NDPP-in seat 40 leh BJP-in seat 20 chu kumin inthlanah pawh hmang chhunzawm leh an tum a ni. Mahse BJP hruaitu ṭhenkhat chu an seat chan hi tihpun an duh a, hei bakah urban seat tam zawk pek an phut bawk.

NDPP hotu leh chief minister Neiphiu Rio chuan 40:20-a seat insem dan tur an lo siam tawh chu tihdanglam a ni dawn lo tih a sawi. Mahse BJP lamin an chanpual turah urban seat pali - Kohima Town, Mon Town, Tuensang Sadar leh Wokha-te dah tel an phutna chu a remtihpui ta a ni.

Kum 2018 assembly inthlanah khan NDPP candidate Dr Neikiesalie Kire chu Kohima Town bial aṭang hian thlan tlin a ni a,a bak bial thumah hian NPF candidate-te an chak vek thung. Mahse heng bial pathuma NPF MLA thlan tlin leh, NPF MLA dang 18-te chuan ahnuah NDPP hi an zawm leh vek a ni.