Tripura-ah candidate 305-in nomination paper thehlut

Tripura legislative assembly inthlan, February 16-a neih turah candidate 305 in nomination paper an thehlut. Assembly bial 60-a inthlanna neih tura chuh tumte tan Thawhṭanni kha nomination paper thehluh theih hun tawp a ni.

Chief electoral officer (CEO) Kiran Gitte chuan Thawhṭanni bikah khan nomination paper hi 228 thehluh a nih thu a sawi. Candidate zingah nomination paper thehluhna lama harsatna leh buaina tawk an awm lo niin a sawi.

Kum 2018-a Tripura assembly inthlanah khan candidate 297 an awm a ni.

CEO chuan Thawhṭanni khan district magistrate leh superintendent of police-te a biak kual vek thu sawiin, candidate-ten nomination paper an thehluhnaa harsatna leh, boruak ṭha lo chhuak a awm loh thu a sawi. Nomination paper thehluhte hi enfiah a nih hnuah, Election Commission chuan candidate-te chu venhimna pawh a ngaihtuahsak nghal dawn a ni, a ti.

Nomination paper-te hi nimin khan enfiah niin, vawiin thleng candidate-te tan inhnukdawh theih a ni ang. Hemi hnu hian candidate final list hi tichhuah a ni ang.

Thawhṭannia nomination paper thehlut zingah hian Tripura chief minister Dr Manik Saha, state Congress president Birajit Sinha leh state BJP president Rajib Bhattacharya-te pawh an tel. CM Saha-a'n Towr Bardowali assembly constituency-a chuh tura nomination paper a thehluhnaah hian Assam chief minister Himanta Biswa Sarma, Manipur chief minister N Biren Singh leh BJP Northeast coordinator Sambit Patra-ten an ṭawiawm.

Assembly inthlan lo awm turah hian regional party ṭhangduang tak, Tripura Tribal Areas Autonomous District Council (TTADC)-ah thuneihna chang mek, Tipraha Indigenous Progressive Regional Alliance (TIPRA) hotu Pradyot Deb Barma chu a ding ve dawn lo. TIPRA hian bial 42-ah candidate an siam a, mahse an zingah Deb Barma hi a tel ve lo. Tripura lal thlah, Deb Barma chuan inthlanah hian an chhungkaw zing aṭangin chuh an awm dawn lo tih a Facebook-ah a lo sawi tawh a, "Kan party chuan thingtlanga kan pasalṭhate chu party ticket kan pe dawn, lal ina mite ni loin," tiin a tarlang.

Tripura legislative assembly inthlan hi February 16-ah neih a ni dawn a, March 2-ah vote tlate chhiarin inthlan result puan a ni ang.