Sikkim: ‘Immigrant’ tia sawi chungchangah assembly session koh phut

Supreme Court-in Sik-kimese Nepali-te 'immigrant' leh 'foreinger' tia a sawi avangin, State chhung hmun hrang hrangah lungawi lohna lantir a ni. Pawl hrang hrangte chuan hemi chungchang avang hian assembly session koh an phut bawk.

Joint Action Committee hmingin state chhungah hian lungawi lohna lantir a ni a; politician, social activist leh pawl leh party hrang hrangte pawh an tel. JAC general secretary Keshav Sapkota chuan state sorkar chu a ṭul dan anga hma la tura an phut thu sawiin, "Sorkar chuan ni sarih chhung ngeiin emergency legislative assembly session a ko tur a ni. A ko lo a nih chuan state pum huapin nawrh kan huaihawt ang," a ti.

Additional advocate general Sudesh Joshi chuan January 13-a Supreme Court-in Sikkim Nepali-te 'foreigner' tia sawi a, chhiah an awl theihnate a tihtawp sak chungchanga lungawi lohna leh, buaina kal zel avangin nimin khan a nihna aṭangin banna a thehlut. Court thutlukna tihchhuah a nih aṭang hian Joshi hi Sikkim state leh Nepali hnamte tana a mawhphurhna ngaihsak tawk loah puhin sawisel a tawk a ni. Mahse nimina Sikkim chief secretary hnenah banna a thehluhah hian an puhnate chu thu dik lo niin a sawi thung.