Assam-ah G20 meeting neih ṭan a ni

India-in G20 president dinhmun a chelh hnua ram chhunga G20 meeting hmasa ber chu nimin khan Guwahati-ah neih a ni a, vawiin thleng a awh ang.

Nikum December 11 khan Indonesia kut aṭanga G20 president dinhmun hi a la a, kumin November thla thleng a chelh ang. G20 presidency dinhmun a chelh chhung hian ram chhung state hrang hrangah G20 meeting hi nghah a ni dawn.

G20 meeting hi Guwahati-ah vawi li leh Dibrugar-ah vawi khat neih a ni dawn. Guwahati-ah hian Ferbuary 2-3 bakah February 6-8 leh March 13-15 bakah, Dibrugarh-ah March 24-25 hian meeting hi neih a ni ang.

Guwahati-a Sustainable Finance Working Group (SFWG) meeting hmasa ber hi Hotel Radisson Blu-ah neih a ni a, he hunah hian G20 member ram bakah guest country, international organisation leh sorkar laipui aṭanga official-te nen, palai 94 an tel. A ni khat niah hian SFWG session vawi thum leh yoga session vawi khat neih a ni a, vawiinah chhunzawmin meeting kharnan palaite hian Brahmaputra Heritage Centre-ah zanriah an kilho nghal dawn a ni.

Meeting nei tura kal, G-20 palaite chuan meeting ṭan hma, Nilaini khan Kaziranga National Park an tlawh.

G20 palaite hian Kohora-a Kaziranga Convention Centre an tlawh hmasa a, hetah hian park enkawltute chuan ramsa humhalhna kawnga hma an lak dan hrang hrangte an lo hrilh a ni. Hemi hnu hian Bagori leh Kohora range-ah jeep safari an nei leh nghal a ni.

Feb 7-8 ah Youth 20 Inception meeting hi Hotel Radisson Blu leh IIT, Guwahati-ah neih a ni leh ang a, palai 250 an tel ang. Anni bakah Assam-a academic institution hrang hrang aṭangin zirlai 400-ten he meeting hi an chhim dawn bawk a ni. Youth 20 meeting-ah hian theme panga “Peace Building and Reconciliation”, “Future of Work Industry”, “Climate Change and Disaster Risk Reduction”, “Youth in Democracy and Governance” leh “Health Wellbeing and Sports” te thlurbing a ni ang.