Meghalaya : South Tura bialah CM leh helpawl hruaitu hlui inkhing dawn

Meghalaya legislative assembly inthlan lo awm turah, BJP chuan chief minister Conrad K Sangma dinna bial, South Tura constituency-ah CM khing turin state unit-vice president leh helpawl hruaitu hlui, Bernard N Marak a ruat.

BJP hian Ningani khan party candidate an puang a, assembly bial 60-ah an chuh vek dawn a ni.

Chief minister Sangma kaihhruai Meghalaya Democratic Alliance (MDA) aṭangin BJP hi thla hmasa khan an chhuak a, inthlan lo awm turah party malin an chuh dawn a ni.

Candidate list tihchhuahah hian tun hnaia MLA aṭanga banga BJP zawmtu, HM Shangpliang, Ferlin Sangma, Benedict Marak leh Samuel M Sangma-te pawh an tel. State BJP president Ernest Mawrie chu West Shillong bialah a ding dawn a, party thupuangtu MH Kharkrang chu North Shillong bialah a ding ang. BJP MLA candidate zingah hian hmeichhia pasarih an awm.

Kum 2018 assembly inthlanah khan BJP hian bial 47-ah chuhin, bial hnihah chauh an chak a ni.

South Tura biala CM khingtu tur, Bernard Marak hi Garo tribal tana state hran phuttu, Achik National Volunteer Council (ANVC) hruaitu hlui a ni. Kum 2014 khan sorkar kuta inpein, ANVC-B group pawh tihtawp zui a ni bawk. Criminal case 25 chuang a nei a ni. Marak hi West Garo Hills district-a Tura khaw bula farmhouse-ah nawhchizawrhna hmun siamah puhin, man a lo ni tawh a, a farmhouse-ah hian puaktheithilte man a nih avangin thubuai pawh siamsak a ni bawk. Mahse tunah hian bail-in chhuah tir mek a ni.

Meghalaya assembly inthlan hi February 27-ah neih a ni dawn a, March 2-ah vote tla chhiarin inthlan result hi puan a ni ang.