Tripura assembly inthlan turah candidate 259 awm

Tripura assembly inthlan neih tura nomination paper thehluhte enfiah a nih leh, inhnukdawk duhte tana hun pek a ral hunah, candidate 259-ten inthlan hi an chuh dawn ta.

Chief electoral officer Gitte Kirankumar Dinakarrao chuan nomination paper thehlut hi 310 an awm a, heng zinga 19 chu enfiah a nih hnuah hnawl an ni a, mi 32 an inhnukdawk leh bawk tih a sawi.

Kum 2018 assembly inthlanah khan candidate hi 297 an awm a ni. Member 60 awmna, Tripura legislative assembly inthlan hi February 16-ah neih a ni ang.

Rorellai, BJP chuan bial 55-ah candidate an nei a, an thawhpui Indigenous People's Front of Tripura (IPFT) chuan bial parukah candidate an nei ve bawk. Ampinagar Assembly constituency bikah BJP leh IPFT hian candidate an nei ve ve a ni.

CPI(M) chuan seat 43-ah an chuh tawh a, Left Front hnuaia party dang Forward Block, RSP leh CPI chuan bial khatah ṭheuh an chuh ang. Left Front hian West Tripura-a Ramnagar biala independent candidate chu an thlawp dawn tih an sawi.

Left Front nena thawkdun, Congress party chuan bial 13-ah an chuh dawn a ni.

Tripura regional party, Tipra Motha chuan bial 42-ah candidate an nei a, Trinamool Congress-in candidate 28 neiin, independent candidate 58 an awm bawk.

CEO Dinakarrao chuan sub-division 23-ah February 8 aṭangin postal ballot thlak a ni dawn tih a sawi. Vote thlakna tur, polling station chu 3,328 aṭangin 3,337-ah tihpun a ni.