Assam : Kum tling loa inneih chungchangah mi 1,800 chuang man

Assam sorkarin an state-a kum tlingloa innei, child marriage thleng ṭhin titawp tura hma a lak mekah, mi 1,800 chuang man an ni tawh.

Chief minister Himanta Biswa Sarma chuan, police-ten state pum huapa beihpui an thlaknaah, Prohibition of Child Marriage Act bawhchhia mi tam tak an man tawh thu sawiin, hma an la chhunzawm zel dawn tih a sawi. An mi man tam zawkte hi hmeichhe kum tlinglo nupuia neitute an ni hlawm.

Kar liam ta chhung khan child marriage chungchangah Assam police-te chuan thubuai 4,004 an ziaklut hman a ni. Thubuai ziahluh hi Dhubri district-ah tam berin 370 ziahluh a ni a, Hojai-ah 255 leh Udalguri-ah 235 ziahluh a ni bawk. Hetih lai hian Dima Hasao chu Assam state-a child marriage thlen tlemna ber district a ni thung.

1929 Act hnuaiah hmeichhia kum 14 hnuailam leh mipa kum 18 hnuai lamte chu nupui/pasal neih khap a ni. Kum 1978 khan he dan hi siamṭhain, nupui/pasal nei thei chin hi hmeichhia kum 18 leh mipa kum 21-ah tihsan a ni.