Nagaland : ENPO -in inthlan boycott tum an titawp

Eastern Nagaland People's Organisation (ENPO) chuan state hran, Frontier Nagaland din an phutna nawrna atana an state-a inthlan boycott an tum chu an titawp.

ENPO hnuaiah hian Nagaland khawchhak lam district paruk - Mon, Tuensang, Kiphire, Longleng, Noklak leh Shamator-a hnam (tribe) pasarih an awm a ni. Heng district paruk huam chhungah hian Nagaland assembly seat 60 zinga seat 20 a awm. State hran an phut chungchangah nikumin Hornbill Festival neihnaah pawh khan ENPO hnuaia hnam pasarihte hian an lo tel tawh lo a ni.

Kar liam ta Zirtawpni khan ENPO aiawhte leh union home ministry official-te chuan union home minister Amit Shah kaihhruaina hnuaiah meeting an nei a, inremna an siam a ni. Hemi hnu hian ENPO chuan thuchhuah siamin, inthlan boycott an tum tawh lo tih sawiin, Nagaland assembly inthlan lo awm tur chu boruak ṭha tak hnuaia tluang taka neih an thlawp thu an sawi.

Tribal council pakhat hruaitu sawi danin, union home ministry nena meeting an neihah hian Frontier Nagaland Autonomous Council, elected representative 40, nominated member pasarih leh esteemed member pahnih awmna din turin inremna siam a ni.

ENPO hian hun rei tak chu Nagaland khawchhak lam bial chu state hrana siam an lo phut tawh a, kum 2010 khan Frontier Nagaland din an phut chungchangah ministry of home affairs ah memorandum pawh an lo thehlut tawh a ni. Hun eng emaw chen thawm lian tham an neih loh hnu ah, nikum August thla khan state hran an phutna hi thar thawh lehin resolution an pass a ni. Hemi hnu hian an thil phut nawrna atan inthlan lo awm tur pawh boycott an tum thu an sawi.

Union home ministry nena inbiakna an neihah inremna an siam tak vangin, ministry ngenna angin inthlan boycott an tum chu titawpin, ENPO in a huam chhungah pawh inthlan tluang taka neih a nih theihna atan sorkar chu thawhpui turin mipuite an ngen a ni.

Nagaland assembly inthlan hi Ferbuary 27 hian neih a ni dawn a, inthlana chuh tumte tan February 7 thleng nomination paper thehluh theih a ni ang.

Union home minister Amit Shah chuan ENPO-in inthlan boycott an tumna an ṭhulh ta chu lawmawm a tih thu sawiin, prime minister Narendra Modi kaihhruai sorkar chungah rinna an nghah ngam zia an lantir niin a sawi.