PM Narendra Modi-a'n Tripura a tlawh dawn Rahul Gandhi leh Mamata Barnerjee pawh campaign dawn
Prime minister Narendra Modi chuan February 13 hian state assembly inthlan hmachhawn Tripura tlawhin, BJP tan a campaign dawn.
Tripura inthlan neih tura BJP star campaigner-ah PM Modi hi a tel a ni. Campaign tawp ni, February 13-ah kalin, West leh South Tripura district-ah rally a nei dawn tih BJP thupuangtu Nabendu Bhattacharya chuan a sawi a, rally hi hmun parukah buatsaih an tum. PM bakah union defence minister Rajnath Singh, union home minister Amit Shah leh Uttar Pradesh chief minister Yogi Adityanath-te pawh BJP candidate-te tana campaign-in an kal dawn a ni.
Inthlan lo awm turah hian BJP chuan IPFT a thawhpui leh dawn a, eptu party CPI-M kaihhruai Left Front leh Congress party an thawkdun dawn bawk.
Congress party president Mallikarjun Kharge, MP Rahul Gandhi, Priyanka Gandhi Vadra leh party hruaitu dangte pawh Tripura-ah hian campaign-in an kal dawn a, CPM general secretary Sitaram Yechury leh Prakash Karat-te pawhin Tripura hi an tlawh dawn a ni.
Trinamool Congress (TMC) tan West Bengal chief minister Mamata Barnerjee pawh a campaign dawn a, TMC national general secretary Abhishek Banerjee nen tun kar hian rally leh roadshow eng emaw zat an nei dawn tih an party thuchhuah chuan a tarlang.