Assam : RSS hnuaia JDSSM-in ST list aṭanga Kristian paih phût

Assam-a Rashtriya Swayamsevak Sangh (RSS) thlawp, Janajati Dharma- Sanskriti Suraksha Manch (JDSSM) chuan Schedule Tribe (ST) list aṭanga Kristian paih an phût. An thil phut nawrna atan February 12 hian nawrh an huaihawt dawn.

JDSSM chuan Kristian sakhuaa inlette, ST status hnuaia hna laknaa reservation siamsak an ni chu tihtawp an phût a ni. Sorkar laipui leh state sorkar chu Constitution-a Article 342A siamṭha tura phutin, February 12 hian 'Challo Dispur' programme hnuaiah nawrh hi huaihawt an tum a ni. President Droupadi Murmu leh prime minister Narendra Modi hnenah pawh memorandum thehluh an tum bawk.

"Ram dang sakhua - Kristian leh Islam zawmtute chuan hamṭhatna hi a thuahin an dawng a ni. An fate chu Kristian school-ah kaltirin minority angin hamṭhatna an dawng a, ST tana scholarship, hna leh promotion-te an hmu leh bawk, " tiin JDSSM, Assam Pranta co-convenor Binud Kumbang chuan a sawi.

Kumbang chuan sawi zawmin, "Heng bakah hian MP, MLA leh autonomous body inthlanahte an chuh leh a, theihtawp chhuaha an hnam nunphung humhalh tura beitu tribal-te chanvo an chhuhsak a ni," a ti. An thil phût chungchangah hian state chhunga tribal tamna district-ah pawh rally ṭum eng emaw zat an lo nei tawh a, tribal hruaitute pawhin an thlawp ṭha hle tih a sawi bawk.

Assam-a tribal hnam, nuai 40 vel zinga nuai 7-10 vel chuan Kristian sakhua an zawm a, a bikin Dhemaji, Majuli, Sadiya, Golaghat, Karbi Anglong leh Dima Hasao district-ahte tribal-te chhan tam tak vangin Kristian sakhua an zawm a, sakhaw danga inlet hi an pung chho zel niin JDSSM co-covenor chuan a sawi. "Eng sakhua mah kan dodal lo. Mahse kan ṭawng, tradition leh culture hi humhalh kan duh a ni," a ti.

JDSSM Assam Pranta president Bagiram Boro pawhin sakhaw inlehna thleng ṭhin chuan ST-te dinhmun a tiderthawng a ni tiin, tribal hnamte Kristian leh Islam sakhuaa an inleh hi tun hma aṭangin thleng fo mah se, tun hnaiah a pung chak zual niin a tarlang.

Assam Christian Forum (ACF) secretary Chowaram Daimary chuan JDSSM thil phut hi chhangin, constitution hnuaiah ST status hi hnam behchhana siam niin, sakhaw thil nen inzawmna a nei lo tih a sawi. "Sakhaw inleh chungchang kan sawi a nih chuan, Bodo hnam hian a tirah pathian Obanglaoree betu, Bathouism sakhua an zawm ṭhin. Mahse a hnuah Hindu sakhuaah an inlet a ni. Sakhaw inleh chungchang sawi apianga sakhaw pahnih hming bik sawi lan ziah hian pawl ṭhenkhatin Bodo mipuite rilru tihbuai leh inngeih lohna thlentir an tumna angah a ngaih theih a ni," a ti.

United People’s Party Liberal (UPPL) leh All Bodo Students Union (ABSU) hruaitu hlui, Lawrence Islary pawhin JDSSM thil phut chu Assam leh hmarchhak state danga tribal-te tan a ṭha dawn lo tih sawiin, "Sorkarin an thil phut hi a pawm a nih chuan tribal-te dinhmun hi a chhe zawk dawn a ni. ST status-a dah tur hian criteria panga a awm a, heng zingah hian sakhaw lam hi a tel lo," tiin a sawi.