Greater Tipraland hi thil theih a ni lo : Tripura CM

Tripura chief minister Manik Saha chuan regional party, Tripra Motha in state hran, 'Greater Tipraland' din an phutna chu thil theih a ni lo tih sawiin, state hran din an phutna hian Assam leh Mizoram nena an inrina bakah, Bangladesh ramri thlengin a khawih dawn a ni, a ti.

Pradyot Kishore Manikya Debbarma kaihhruai Tipra Motha chu thil tih theih loh tih tumah puhin, state chhunga tribal leh non-tribal te inkar boruak ṭha tak awm ṭhin tichhetuah CM chuan a puh bawk.

"Greater Tipraland siam an tumna hian Assam leh Mizoram boundary a kaltlang bakah, Bangladesh pawh a khawih tel a ni. Hei hi anni hian an lo pawm thei dawn em ni?" tiin thil theih a nih loh thu South Tripura-a BJP 'Vijay Sankalp' rally-a thu a sawinaah a sawilang a ni.

Tripura Tribal Autonomous District Council (TTADC)-a rorellai, Tipra Motha hian Tripura aṭanga state hran, Greater Tipraland din an phut a, assembly inthlan lo awm turah pawh an thil phut pawmpui lo chu an thawhpui theih loh thu an sawi. Hei vang hian inthlanah pawh party mala chuh an tum a ni.