Sikkim : Joint Action Group-in bandh huaihawt dawn

Supreme Court-in Sikkimese Nepali-te 'immigrant' tia a sawi avanga lungawi lohna lantirna kal zelah, Joint Action Committee (JAC) chuan February 8 hian state pum huapin bandh an huaihawt dawn.

JAC hian January 31 khan lungawi lohna lantirin rally an lo huaihat tawh a, state sorkar pawh a ṭul anga hma la tura phutin, ni sarih hun an pe a, an hun pek hi vawiin hian a zo dawn a ni. Mahse hun tiam chhunga sorkarin hma a lak loh avangin bandh hi an huaihawt dawn tih JAC general secretary Keshav Sapkota chuan a sawi.

February 8-a bandh neih turah hian JAC chuan chhungkaw tin aṭangin member pathum tal tel turin an beisei tih an sawi bawk.

Sapkota chuan, "JAC hi politics nena inkaihhnawih ani lo a, political party leh mimalin emaw nawrh an huaihawt chu JAC hian a thlawp ve lo a ni," a ti. Rally neihna ṭhenkhatah tharum thawhna thleng awmte chu ṭha an tih loh thu sawiin, tharum thawhna leh ram dodal zawnga chetna chu an thlawp loh thu a sawi.

Sikkimese Nepali-te sawi dan chungchanga an buaina mek chu state sorkar chinfel tur a ni a, mipuite pawh an ngaichang tur a ni, a ti. February 9-a state assembly session neih a ni tur chu ṭha an tih thu sawiin, he session-a an thil rel dan chuan JAC hma lak zel tur pawh a hril dawn tih a sawi a ni.